CROESO
Mae Tir Natur yn elusen Gymreig sy'n canolbwyntio ar adfer byd natur yng Nghymru drwy ailwylltio.
Rydyn ni wedi sicrhau safle 1,195 erw yng Nghwm Doethïe i sefydlu safle ailwylltio mwyaf Cymru.
Gall eich cefnogaeth ein helpu i wireddu hyn.
Mae Tir Natur yn defnyddio dull sydd wedi'i brofi’n effeithiol i adfer byd natur ar y safle: ailwylltio. Mae ailwylltio yn adfer ecosystemau i fod yn ddeinamig, yn hunangynhaliol ac yn wydn yn wyneb effeithiau newid hinsawdd. Mae'n helpu i roi gwe ryfeddol bywyd at ei gilydd unwaith yn rhagor. Ar hyd a lled y DU, mae ailwylltio eisoes wedi dangos canlyniadau rhyfeddol, gyda natur yn dychwelyd mewn ffyrdd sy'n cynnig ysbrydoliaeth wirioneddol.
Hanfod ein dull yw pori naturiol. Rydym wedi cyflwyno nifer fechan o wartheg gwydn a merlod mynydd Cymreig i grwydro'n rhydd – gan bori a blewynna, tyrchu a sathru – yn union fel y byddai'r anifeiliaid hynafol gwyllt a ddaeth o'u blaenau wedi'i wneud. Wrth wneud hyn, mae'n helpu i adfer cynefinoedd coll sy'n cynnal bywyd gwyllt a phlanhigion brodorol.
Ar y cyd â gwaith adfer mawndir, bydd y rhywogaethau allweddol hyn yn trawsnewid y dirwedd. Bydd bywyd gwyllt yn ffynnu a bydd y tir yn dal mwy o ddŵr - gan leihau perygl tanau gwyllt a llifogydd ar lawr gwlad. Bydd ansawdd y dŵr a'r pridd yn gwella, a bydd mwy o garbon yn cael ei storio yn y tir.
Mae'r gwaith hwn yn mynd y tu hwnt i ecoleg – mae'n cynnwys cymuned hefyd. Mae'r weledigaeth yn un ble mae byd natur a chefn gwlad yn ffynnu gyda'i gilydd, gan ddod â bridiau hynafol, gwybodaeth draddodiadol, a chadwraeth fodern at ei gilydd.
Dyma ydy gobaith i fyd natur.
Darllenwch hanesion o Gymru Wylltach
Neges gan ein Llysgennad,
Iolo Williams
"Mae Cymru ymhlith gwledydd y byd sydd wedi gweld y colledion mwyaf o ran natur, ac er gwaethaf ymdrechion cadwraeth, mae ein bywyd gwyllt yn dal i ddirywio.
Yn ystod fy oes i, rwy wedi gweld dirywiad enbyd mewn rhywogaethau fel draenogod, cornchwiglod a breision melyn.
Os ydyn ni am newid cyfeiriad, rhaid i ni ddangos mwy o uchelgais. Rhaid i ni fod yn meddwl am adfer ecosystemau cyfan ar raddfa fawr, er mwyn i natur allu gofalu amdani hi ei hun.
Rwy'n teimlo'n gyffrous iawn am gynlluniau Tir Natur i ddangos hyn yng Nghymru!"
Delweddau: Gwartheg Tir Natur (Sholto Van den Bogaerde); Merlyn (David Kilner); Tir, Glöyn byw a Chornchwiglen (Shutterstock); yr holl ddarluniau (Katherine Jones Artist)